We hebbe d’r nag langer op môtte wachte den we gewind zien, maar ’t liek d’rop det Vastelaovend 2022 wir geit liéke op de Vastelaovend, zoë-as we dae gewend ware.
Beeldend kunstenaer Sabrina van Wijlick oét Belvend haet vur de kômmende carnaval in idder geval d’n Opsjtaeker 2022 ôntworpe en det ving hét ein hiele groëte iër.
“Ich vông ’t hiel erg tôf wie Ron van Soest, de veurzitter van de Belhamels, mich vroog of ich d’n Opsjtaeker 2022 wôl ôntwerpe, en dao bön ich hiel gruëts op”.
Sabrina van Wijlick makde dees brosch oét naam van alle viéf de sjtadsdeilvereiniginge van de Gemeinte Venlo. “Hiel vuël minse in ôs regio hebbe hert vur de vastelaovend, det veul-se. Zeker wie ‘t fiës in 2021angers waas den in veurgaonde jaore.
“Det ‘haaj-je van’ heb ich probeere oét te drökke in deze niej-je Opsjtaeker. ’t Is ein aope hert met dao umhaer ein zaag, symbool vur de (wage-)bouwers, eine kwas vur de grimeurs, de träöt en de solsjleutel vur de muzikante en netuurlik de vlag, dae met dees dolle daag oét meug. ’t Aope hert luët de kleur van ’t ‘pekske’ van d’n drager zeen. Dit ôntwerp, van in totaal dreej sjetse, is oéteindelik door de viéf sjtadsdeilvereiniginge gekaoze”.
Sabrina van Wijlick viert al zien ganse laeve vastelaovend. “Ich vier det vural met ôs kammeräö-j. Idder jaor bouwe we taeves ‘nne wage en trekke we mei-j met de Belvendsen optoch. Ôzze naam? ‘’t Jeuk wir’. Maar auch boéte ’t seizoén is ’t kreatief bezig. “Ich bön chef-dekor beej de musical van ’t Venlose Valuascollege”.
‘D’n Opsjtaeker’ is ’n saort brosch die sjteit vur ’n dreejtal zake: einem bliék van waardering vur de vuële vreejwilligers die allerlei carnavalsaktiviteite organiseere in de sjtadsdeile Venlo, Bliërick, Tegele, Belvend, Arcen.en Velden; einem bliék van betrokkenheid met de vastelaovend en ‘nne finansjeelen opsjtaeker vur alle carnavalsvereiniginge oét dees regio.
De viéf sjtadsdeilvereiniginge van de gemeinte Venlo haope det de inwoëners juus nôw massaal dees vastelaovesbrosch zulle koupe um zoë de versjillende gezelsjappe te ôngersjteune.
Sabrina van Wijlick (1978) is getrouwd met Roy en zeej hebbe ein döchterke van dreej. In zien dageliks laeve werk hét as docent Kuns & Kultuur op ’t Valuascollege in Venlo.
Daonaeve is ’t thoés vural bezig met keramiek, ein passie die ’t met de paplaepel kreeg ingegaote.
Ziene pap, Herman Crins, waas namelik pottebakker en dae is nao zien karriëre achter de pottebekkerssjiéf, keramiekkursusse gaon gaeve. Get, wat zien dochter inmiddels haet euvergenaome.
Daobeej werke mien vader en ich same aan opdrachte die we kriége. Maar ich maak taeves vuël eige werk, det ich probeer te verkoupe”
Miër informaasie-j euver over Sabrina van Wijlick is te vinge op de Facebook Site “Keramiek de Pöngelhook”.
D’n Opsjtaeker 2022 zal op d’n Elfde van d’n Elfde waere gepresenteerd. Vanaaf daen datum is-e auch te koup via de versjillende websites van de vastelaovesvereiniginge, in ein groët aantal winkels en tiédens carnavalsaktiviteite.
