Op dinsdigmorge 13 mei j.l. is aad-Oelesprins Hans Schreurs op 66-jaörige laeftiéd euverleeje.

Hans vormde same met zien adjudante Frans Schatorje en Frans Schreurs ’t Oelestrio van 1997. Zeej ginge de vastelaovend véur ônger ’t motto “Idderein telt mei-j”.
Dreej jaor geleej-e, persiés ôppen daag van de Sociëteit Oeles Prinse (SOP) veurjaorsvergadering, kwaam ’t onheisjpellende berich det beej Hans die vreselikke ziekte waas gekonsjtateerd.
Ôndanks soms haopvolle berichte haet hae daen ôniërlikke sjtriéd neet meuge winne.
De SOP verluus ‘nne betrokke kammeraod dae naogenôg noeits ein samekoms euversjloog.
Hans waas ‘nne vastelaovesvierder pur sang.
Same met zien kammeraöj vormde hae ônger de naam FC Oranje ein sjteevás ongerdeil in d’n Tegelsen optoch. Maar leefs 4 X 11 jaor deeje zeej onaafgebraoke mei-j.
Legendaries waas toen Hans mei-jleep as Keunigin, kompleet met kroën, pruúk en ‘nne maeterslange sjlui jer dae door zien adjudante hilaries woort gedrage.
Veur zien vuële verdeenste vur de Tegelse gemeinsjap, ônger angere as veurzitter en penningmeister van sportclub Irene, is Hans gedekoreerd as lid in de orde van Oranje Nassau.
Daonaeve kreeg hae ein waarderingsôngersjeij-ing van de gemeinte Venlo.
De SOP verluus ‘nne bevlaoge kammeraod en zalle öm gedinke as ‘nne markante, humorvolle persoën.

Weej winse zien femilie en vrinde hiel vuël sjterkte met dit groëte verlees.

Vastelaovesgezelsjap D’n Oeles
Sociëteit Oeles Prinse
Vereinigde Oeles Adjudante