Aafgeloupe dinsdaagaovend 9 juli j.l. is in ‘t beejzien van zien femilie-j, Herm Hermans euverleeje, Herm waas pas 3 maond krank.

Deze minse-mins haet ôntiegelijk vuël gedaon vur de Tegelse vastelaovend in n’t algemein en vur D’n Oeles in ‘t bizônger.
In 1987 woord Herm Hermans Oelesprins en vormde same met Gerard Fokkens en wijlen Wim Beurskens ‘t Oelestrio ônger ‘t motto “Dreej daag sjpringe, lache , praote,.. en aswoensdaag sjtoum aaflaote.”
Vanaaf dét moment waas Herm Hermans verknoch geraak aan zienen Oeles en woort-e auch metein nao dae vastelaovend lid van de Sociëteit Oeles Prinse (SOP). Taeves sjloot-e metein nao zien prinssjap aan as lid van de raod van elf.

Same met ‘nne gas kemmissieleeje woort d’r ein jeugkemmissie-j opgerich, waovan Herm ziër aktief lid woort met as gevolg, dét ‘t allerierste Oeles’Jeugtrio in 1990 aan de Tegels jeug woort veurgesjteld.

Jeugprins Guido-I, Cruijsberg met zien twië adjudantjes Ralph Beurskens en Ramon Linssen. Inmiddels is ein jeugtrio neet miër weg te dinke oét de Tegelse vastelaovend. Tig jaor lang ware Herm en zien vrui-jke Elly daag en nach in de waer names en vur de jeugkemmissie-j. Daonaeve-beej waas Herm vuële jaore lang adviseur en lid van de ôngersjeidingskemmis-sie-j van D’n Oeles.
Auch waas Herm hiel get jaore betrokke as veurzitter van de sjnuutjes; de dames van de hiëre van de R.v.11.

Vur al zien verdeenste en in ‘tt kader van zien 3×11 jaorig lidmaatsjap is Herm beneump toet Iërelid van D’n Oeles. Tuurlik waas-e auch lid van de Oelessenaat. Vur al zien werk woord Herm same met zien Elly gedekoreerd as Lid in de Orde van Oranje Nassau.

Tegele, D’n Oeles en de SOP verleere ein markante persuënlikheid. Weej zulle Herm bliéve gedinke as eine fijne mins. Weej winse Elly en de ganse femielie-j Hermans hiel vuël sjterkte toe met dit groëte verlees.

Vastelaovesgezelsjap D’n Oeles
De Oelessenaat
Sociëteit Oeles Prinse,
Vereinigde Oeles Adjudante