Oeles Buute Gala 2020.

Dreej aovende giere en brulle
met o.a. Fer Naus, Boy Janssen, Bas van Neer

D’n Opstaeker - 2020 ein ôntwerp van Ruud Simons

Beeldend kunstenaer Ruud Simons oét Bliërick haet vur de kômmende vastelaovend  D’n Opsjtaeker 2020 ôntworpe. Vors Carotius VIII van Vg. De Wortelepin vroog Simons um dit jaor oét naam van alle viéf de stadsdeilvereiniginge d’n Opsjtaeker vur 2020 te ôntwerpe. ’t Ôntwerp van Simons is ein ode aan de kater.

“Met Vastelaovend tovere we altiéd wir de meis fantasievolle kreejaasie-js ônger ôs muts oét. De wildste idee-je ôntsjtaon, de kreejaativiteit knalt oét ôzzem bums en vingk zien vorm in oéteinloupende kostuums, gesjmienkde gezichte, heud en optochwages. D’n tiéd van joeks en theater is aangebraoke, wao-beej ’t vloeibaar gôld ouch riékelik door de sjtraote sjtruimp”, aldus Simons. “Maar zoë-as alles in ’t laeve, haet ouch de Vastelaovend soms zien kiërzijde. Met al det gefiës ken ’t zien, det me ’s angerendaags opsjteit met ‘nne bônkende koppién ônger de muts. D’n alcohol tuënt den zien vals karakter. Beej minnige vastelaovesvierder is den eine paracetamol, ’n ganse baek kôffie en ’n geruësterd bôtterhemke nuëdig, um zich ‘sjmiddigs wir vol euvertuuging euver te kenne gaeve aan de muziek en ’t gedans. En op-ens huër-se den wir: sjöd d’r mich nag einen in, ich ving det grei-j zoë lekker...”

 D’n Opstaeker is ’n saort brosch, die sjteit vur ’n dreejtal zake: einem bliék van waardering vur de tig vreejwilligers, die minnige vastelaovesaktiviteit organiseere in de sjtadsdeile Venlo, Bliërick, Tegele, Belvend, Aarsse en Velde; einem bliék van betrokkenheid met de vastelaovend en ‘nne finansjeelen opsjtaeker vur alle vastelaovesvereiniginge oét dees regio. De viéf sjtadsdeilvereiniginge van de gemeinte Groët-Venlo haope det de inwoëners, net as vurrig jaor, dees brosch wir massaal zulle koupe um zoë de versjillende vastelaovesaktiviteite van de opgemelde vereiniginge te ôngersjteune.

Opsjaeker 2020

Ruud Simons (57) haet in Mesjtreech de Sjtadsakademie vur Toegepasde Kuns (ABKM) bezôch in de iërste graad docente-opleiding TEHATEX, wao-in hae in 1986 is aafgesjtudeerd. Hae kreëert twië- en dreejdimensionaal werk oét allerlei materiaal. Simons is in zien werk vural op zeuk nao de mentale ruumte, die ôntsjteit tösse de vorm en de beteikenis van zien kreejaasie-j. In dees ruumte ôntsjteit de evokatieve krach, ein subjektieve krach, die beej ’t publiek vraoge en interpretaasie-js opwek. Simons is ônger angere bekend van "Circle of Influence" op het Gelreplein in Venlo en ‘t bronze beeldje "De Vastelaoves Geis", de optochtrofee vur de winnaer van de Bliëricksen optocht. Miër informaasie-j euver Ruud Simons is te vinge op: www.ruudsimons.com

D’n Opstaeker 2020 zal op d’n Elfde van d’n Elfde waere gepresenteerd. Vanaaf daen datum is-se ouch te koup beej de lede van de versjillende vastelaovesvereiniginge en tiédens de vuële vastelaovesaktiviteite.

 


Aangesjlaote beej

Logo SLV nieuw

NEG logo Def

Winkelmendje

De winkelwagen is leeg