In Memoriam Tessy Dahmen

In Memoriam Tessy Dahmen

Tessy Dahmen, een prachtig mins met ’n gôlde hert, is ôs vul te vruug ôntvalle.

Wat hebbe we dök genaote van zien geweldige muzikale optraej-jes met zangkwartet “Döbbel Hae, Döbbel Het” tiédens de vuële Oeles’ Prinsebals, Liedjes matinees en zittinge in Tegele en wiéd daoboéte.

Altiéd met schwung en enthousiasme. Hét waas in de weeg gelag um minse te amuseere. Gasvreejheid en gezelligheid sjtônge beej Tessy den ouch hoëg in ’t vaandel.

Jaorelangk waas het, same met Lucas, ôngerdeil van de Prinsekemmissie-j. Hiel vuël Prinselikke Trio’s hebbe in daen tiéd kenne geniete van sjoëne aovende met ’n heerlik door úm verzorg natje en droogje.

ALTIÉD EIN WERM BAD!!

Sinds ingkele jaore zien de Raod van Elf en alle kemmissie-jveurzitters met partners welkom tiédens de iërste tradisjoneele vergadering van ’t niej-je seizoén in de vorm van ‘nne barbecue. De deur sjteit den wagewiéd aope.

’t Intern veursjtelle van ’t niej-je prinselikke trio aan de Raod van Elf, senaatsleeje, kemmissie-j veurzitters en de SOP- en VOA besjteure, vuraafgaonde aan ’t prinsebal, waas de letste jaore sjteevas beej Tessy en Lucas thoés. Waal 80 genuëdigde euver de vloer en altiéd fiës. Niks waas te gek en altiéd eine gulle en tevraej-je lach op Tessy’s gezich.

Hiel typerend in de vreejgaevigheid van dees werme persuënlikheid, waas zônger miër ’t ter besjikking sjtelle van eure sjilderechtigen haof in 2017 aan boezemkammeraod en Oelesprins van det jaor, Prins Roy-1 met zien Adjudante. Ein richtig fiëspaviljoen woort d’r geplaats en twië waeke lang woorte d’r tig feesjes gevierd met ‘nne hielen houp van ôs.

Tessy regelde jaorelangk ’t sikkertariaat vur de kemmissie-j bals & zittinge op professjonele en keurige meneer. Gen notule ônvolledig en gennen arties of kontrak te laat. Euveral en altiéd sjtông ’t klaorvur idderein.

Werme herinneringe zien d’r aan de vuële kôntakte met de dames van de Raod van Elf en de Senaat. Hiel vuël sjoëne en hertelikke momente zulle ôs allemaol beej bliéve.

Tessy had de Oelesfemielie-j deep in zien hert gesjlaote en daoveur zien we úm ôntzettend dankbaar.

Zien gasvreejheid, gezelligheid, geweldige persuënlikheid en sjpontane lach zulle we bizônger misse. En jao, we hebbe ôs altiéd met zien aanwezigheid geammezeerd!

Ôs gedachte gaon oét nao ziene man en ôzze iëreveurzitter Lucas Jaspers, de kinger en de femielie-j.

Weej winse eur vuël sjterkte in deze moeielikken tiéd.

Besjteur, lede en partners van Vg. D’n Oeles.

Names deze,

Sikkertaris Vg. D’n Oeles