Wiej ’t begôs; “oprichting van Vastelaovesgezelsjap D’n Oeles Tegele”

Wiej ’t begôs;

We sjriéve ‘t jaor 1951 in Tegele.

De Tegelse bevolking is zes jaor nao die versjrikkelikke oorlogsjaore toe aan vastelaovend viere.

Tig Tegelenaere ginge  nao Venlo toe, umdét ze dao al vanaaf 1946 vastelaovend vierde.

Dit taege ‘ t piéne bein van de Tegelse kasteleins.

De “gelofte” .

In d’n oorlogswingkter van 1944 deeje de gezamelikke parochies van Tegele en Steyl en de gemeinteraod same ein belofte, dét as Tegele besjpaard bleef van evakuasie-js, hôngersjnoëd en verder oorlogsgeweld, d’r heej gedurende de kômmende  25 jaor genne carnaval (vastelaovend) gevierd zoel waere.

Deze belofte heel maar zes jaor sjtand, umdét zoe-as heej baove al sjteit vermeld, d’r vuël Tegelenaere nao Venlo ginge um dao vastelaovend te viere.

1e raod van elluf in fibberwarie 1952 met Prins Theej 1 Smeets

Prins Thij Thijssen 1928

In ‘n persberich in de Tegelse Courant van 22 september 1951 doon ein aantal notabele oét Tegele einen oproop vur ‘n beejeinkôms in kefeej Roob van Houba um te ôngerzeuke of de (nao-oorlogse) oprichting van ’n carnavalsvereiniging meugelik zou zien.

En aldus gesjiedde ‘t, dét d’r daen aovend 50 Tegelenaere akte de presence goove, zoedét d’r
‘s aoves ‘n vurluipig besjteur gevormp kôs waere.
Ouch de Tegelse kasteleinsvereiniging droog beej aan dezen oproop en deej ein finansjeele beejdrage.
En zoë woord op dinsdig 25 september 1951 ‘t Comité Oelesvereiniging Tegele opgerich.
De naam van dees carnavalsvereiniging woort bedôch door Thei Rooskens.
‘t Vurluipige besjteur besjtông oét Rein Olders 1e veurzitter, Sjeng Denessen Vors, John Werps penningmeister, Hein Cremers, Thei Rooskens, Sjraar Lucker en Jan Schouwenberg.
Piet Stoffels zoot neet in ut besjteur maar waas waal direk betrokke beej oprichting van ut Oelescomité as mins oppe achtergrôngk dae o.a. de technische kemmissie bemande.

O.l.v. Sjeng Denessen woort ein Raod van Elf samegesjteld, die vural oét middensjtanders besjtông. ‘nne Gas name van dees raodsleeje ware o.a. Pierre Cremers (de Krauw),Sjlechter Toën Dings, Sjeng Doesborgh, Toën van de Kiët (van Heel) fotograaf, Sjtif Kessels d’n architek, Coen van Naadje (Janssen) melkboer, Wiel Poeth, Guus Latiers (fabrikant), Jan Helmes (fabrikant), Pietje v.d. Böl (Ewals) transportbedriéf en Sjraar Lucker en Harie Smits van de sjlökhandel, Sjraar Thurlings van zaal Vriendenkring. Presiés twië maond nao de oprichting van dit comité presenteerde zeej zich formeel op 17 november 1951 tiédens ein carnavalszitting in ’t openbaar. Hein Cremers had inmiddels de veurzittershamer van Rein Olders euvergenaome.

Zoë kôs vors Sjeng Denessen in fibberwarie van 1952 op de mert d’n alleriërste Oelesprins aan ‘t Tegelse publiek veursjtelle; namelik Theej - I Smeets van de tabaksgroëthandel.

‘t Sjting zjwart van de minse, die heejvan getuuge ware.

“D’n Oeles hoëg de zörg aan kangk en nôw ens flink gelach”. ‘t Lijfleed van toen en det nôw nag sjteeds wuërdt gezônge beej binnekôms van ‘t Oelesgezelsjap.

prins Sef 1 Kreykamp 1937

Prins Wiel 1 Doesborgh 1938

Prins Frits 1 Stroeken 1939

In 1953 kôs door de watersjnoëdramp in Ziëland de vastelaovend neet door gaon oét solidariteit met die minse die in deze groëten eelend verkiërde.

De Tegelse kasteleins, de parochies en ‘t gemeintebesjteur o.l.v  Burgemeister Pesch vrooge aevel waal aan de Tegelse, Heierse en Sjteylerse bevolking  um te donere en de kerke besjtaejde heej auch eur aandach aan gedurende alle eucharistievieringe.

In 1954 kôs Oelesvors Sjeng Denessen prins Wiel II Poeth oétroope as 2e prins van ‘t Tegels

Oelescomité.

We sjriéve inmiddels 2022.

‘t Aktuele Oelesgezelsjap is oétgegreu-jd toet ein bleujende groëte vereiniging van zô’n 150 lede, besjtaonde oét ‘n besjteur, Raod van Elf, dansgardes, Oeleskepèl Tegels Blood, Oeles Toekôms, tig kemmissies, de Sociëteit Oeles Prinse (SOP) en de Vereinigde Oeles Adjudante de (VOA),  de jeugkemmissie etcetera. Uig vur verdere deetajs op www.oeles.nl

De prinsegalerie-j  is op deze websait te vinge, net zoë-as de galerie-je van

de jeugprinse van de Oelestrio’s en taeves van de Vorste.

Verder zoel dees  nieje sait Oeleshistorie-j waere oétgebreid met aaj foto’s en filmkes oét ’t verleej-je.

Vurdét Vg. D’n Oeles offisjeel waas opgerich, zién er in Tegele aevegood ‘nne gas

carnavalsfiéste georganiseerd. Det waas veur de 2e waereldoorlog en die woorte o.a. georganiseerd door Comité Tegels Belang.

‘n Paar aa-j foto’s  van Prinse oét daenn tiéd zien taeves op dees webpagina te vinge.

D’n Oeles haet in eure historie diverse narre gehad en funkemarietjes die de prinse oét de 50 en 60 er jaore begeleide,

Dao naeve beej had men toen ouch wisselend den waal den neet ein prinsegarde die de prins begeleide.

In 1956 woord de Prins Lambert I Thijssen vergezeld van ein nar en 2 adjudante, dit waas ouch ut geval in 1958 beej Prins Bert I Kurstjens van de Globe dae 2 adjudante had n.l. Lou Noten en Lou Janssen, de letste Lou Janssen is ouch nag ens in 1979 adjudant gewaes beej Prins Sef I van Houba.

Toét 1972 woorte de prinse vaerder begeleid door ein nar en funkemarietje de letste waas Oelesprins Mat I Hendriks  (de bekker).

In 1973 kwaam Oelesprins Sjtaef Beurskens met 2 adjudante t.w. Toén Clabbers en Rene Stoffels en vanaaf 1977 tot heden

waere alle Oelesprinse gesjteund en begeleid door 2 adjudante, met sjpraek dén ouch van ein Prinselik Trio.

Door ut blaajere in de diverse oetrolmenu zeet geej de prinse en adjudante gallerie en neet te vergaete vanaaf 1990 de jeugprinsegallerie.