Op zôndaag 31 oktoëber 2021 waas ’t aan de oever van de Maas gelaege Jochumhof op Sjteyl opnie-j ’t dekor vur de euverdrach van ’t letste Oelestrio nao de Sociëteit Oeles Prinse (S.O.P.) en de Vereinigde Oeles Adjudante (VOA).

Nao ’t äöpeningswaord door Oelesveurzitter Cor Jansen hadde preses Maurice sr. Houba en de CEO van de VOA, Frank Rijvers, de iër um de talriék aanwezige aad-prinse en aad-adjudante, eur partners en alle angere aanwezige toe te sjpraeke.
Netuurlik wir op ’n ludieke wiéze, waodoor d’r hiel get aafgelache woort. Alles vural gerich aan ’t adres van de sjeidende prins Ruben-1 Linssen en zien adjudante Florian Faassen en Thomas Vossen.
Auch Gé Deenen waas van de partie-j, en dae zorgde vur de toepasselikke muzikale noot.

Vervolges woorte de hiëre opgenaome in allebei de Gezelsjappe. Ze woorte gedekoreerd met ’t felbegeerde SOP- en VOA kruuts en daomei-j toet in lengte van jaore verbônge aan dees twië vereiniginge.
Dees sjoëne uuterlikke teikens van waerde woorte vergezeld van persuënlikke oorkondes.
De dreej sjarmante dames van ’t trio ôntvinge nag ein sjoën boeket bloome.
Nao ’t offisjeele gedeilte waas ’t op de zg. afterparty nag enorm gezellig ônger ’t genot van ’n hepke en minnig drenkske in dees sjoëne lokaasie-j op Sjteyl