Iërelid Herm Hermans en Jeugprins Lars I Broekman kômme prominent in beeld in de documentaire ‘t Verdreet van Vastelaovend, die zôndaag 13 fibberwari te zeen is in ‘t Venlose filmtheater “De Nieuwe Scene”. Vanaaf 14.00 oor sjittere zeej op ‘t witte bioscoopdook, same met ônger angere Jos Cremers, ontwerper van D’n Opsjtaeker van 2021.
In ‘t iërste carnavalloze coronajaor ging filmmaker Frank van Osch oét Den Bosch vur dees film op zeuk nao doorgewinkterde vastelaovesveerders in zien eige Oeteldonk, Groenlo (Grolle) en ‘t Tegelse Oelesriék. Dao sjprook hae met Herm Hermans, Oelesprins in 1987 en iërelid van D’n Oeles, kunstenaer Jos Cremers (maker van D’n Opsjtaeker 2021), Enith Canjels en Véron Broekman en eure zoon Lars, de letste jeugprins van D’n Oeles in 2020.
De verhaole zien bloodserieus en joeksig tegeliek. Persuënlikke herinneringe, sjoëne anekdotes en ein scala aan emoties passere de revue. ‘t Camerateam ging ônger miër mei nao de bouwhal vur optochwages, ‘t kerkhaof en nao ‘t laeg café. De beelde tuëne eine vastelaovend dae totaal angers is den angers. De verhaole gaon euver de deepgewortelde zeel van ‘t volksfiës en de traone umdet ‘t aafgeloupe jaor neet doorging.
Umroop Brabant zendt de film in verkorte vorm oét op 20 februari. Umroop MAX kump op vastelaoves zôndig 27 februari met ein nag kortere versie. In zien gehiël is de documentaire allein te zeen in ‘t Venlose filmtheater. Veuralsnag geit ‘t um ein eenmalige vertuëning. De veursjtelling in “De Nieuwe Scene” begint um 14.00 uur.
Foto’s: Van Osch Films
