Vastelaovend 2022. Gennen Tegelsen optoch en auch genne prins. Gebeurt d’r den gaar niks dit jaor? Vg. D’n Oeles geit in idder geval probeere vur get kleur te zorge en ruëp alle groëte en kleine vastelaovesgekke van Tegele, Sjteyl en de Hei op um mei-j te doon.
Oelesjournaal
Um te beginne velt in ’t wiekend van 19 en 20 fibberwarie de twiëde edisiej van ’t Oelesjournaal in de breevebös. In plaats van de tradisjoneele Oeleskrant versjiént auch dit jaor ein gratis vastelaoveskrant hoés-aan-hoés in ein oplage van 8.000 eksemplare.
Met d’n Tegelsen optoch as roëj-jen draod en deze kiër gans in ’t dialek.
D’n optoch krieg auch ekstra aandach beej Seniore-umroop Venlo, vurhaer de TZBO. Op de website en Facebook waere toet en met Vastelaoveszôndaag idderen daag opnames oét ’t verleej-je vertuënd. De aajste beelde datere van 1928. Kiék op www.seniorenomroepvenlo.nl
’t Oelesjournaal is of wuërt neet bezorg op adresse met ‘nne “NAE-NAE” sjticker op de breevebös. Wae dit journaal neet haet ôntvange, ken ‘m alsnog aafhaole beej Albert Heijn, Jan Linders, Bakker Bart en Timmermans Lezen en Schrijven in ’t centrum van Tegele, Plus Verbeeten op de Hei of beej COOP op Sjteyl.
Kleurplaat
Um d’n optoch dit jaor toch ’n plaats te gaeve in ’t sjtraotbeeld, haet ’t Oelesgezelsjap taeves ‘nne kleurwedsjtriéd oétgesjreeve. De kleurplaat zit gevouwe in ’t Oelesjournaal. Alle info vur deilname sjteit dao achterop. Oéteraard zien d’r auch priéze te winne!
Raamversierwedsjtriéd
Det letste göldt auch vur ’n anger inisjatief, waomei-j D’n Oeles kleur wilt gaeve aan d’n Tegelse vastelaovend: ‘nne raam-versier-wedsjtriéd. Door ’t raam aan de sjtraotkangk van ’t hoés te versiere, zorge deilnemers neet allein vur get ekstra sfeer. Ze make daomei-j auch kans op ’n bedraag van € 111 of éin van de euverige priéze. Mier informaasiej volg flot. Haaj astebleef de soosjaale meedieja in de gate!
Vastelaovesposter
As sjpraekwaordelikke kers op de taart haet D’n Oeles taeves ‘nne vastelaovespooster laote drökke. Dae pooster is ’n ôntwerp van de Venlose kunstenaer Albert Kiefer. Dezelfde aafbeelding siert de veurpagina van ’t Oelesjournaal. Deze pooster, in a-2 formaat, is vanaaf 21 fibberwarie in beperkte oplage gratis verkriégbaar beej Albert Heijn, Jan Linders, Bakker Bart en Timmermans Lezen en Schrijven in ’t centrum van Tegele, Plus Verbeeten op de Hei of beej COOP op Sjteyl.
Zoë-as bekend, zien alle Oelesaktiviteite geannuleerd. Dit göldt dus auch ônger miër vur de Seniorezitting en ’t Oeles’ Buuttegala. “Dit heuf aevel neet te beteikene, det ’t sjtil bliéf met vastelaovend”, zaet Oelesvors Roy Peters.
“Ôs motto ’t Drei-jt wir is vurrig jaor bedôch in de euvertuuging, det d’r vanaaf d’n elfde van d’n elfde wir vuël, zoë neet alles, meugelik zou zien of waere. Maar jaomer genôg bleek niks minder waor. Wao alles toet vur kort sjtil sjtông, begint d’r nôw langzaam get te drei-jje. Haopelik kenne we aevegood nag ’n bietje vastelaovend viere.”
Veurzitter Cor Jansen ruëp de Tegelse vastelaovesvierders op um mekaar in idder geval ein hert ônger de reem te sjtaeke. “Door dae sjoënen Opsjtaeker te drage en de vlagk oét te sjtaeke um te laote zeen det ’t Vastelaovend is.”
Daen Opsjtaeker – 2022 is te koup beej 100MHz Computer Service, Beurskens Badkamers, Bakker Bart, Timmermans Lezen en Schrijven in ’t centrum van Tegele en Plus Verbeeten op de Hei.
