Oeles Jeugprinsebal

Wao d’n Oelesprins op zaoterdig wuërt geprezenteerd aan Tegele, zal d’n hiërser van de Tegelse jeug de zenuwe einen daág langer in bedwang môtte haaje. Zoë-as gebroékelik wuërt namelik op de zôndaág nao Prinsebal ‘t nieje Jeugtrio van Vastelaovesgezelschap D’n Oeles bekend gemak.

Op zôndaág 1 fibberwarie 2026 zal in de groëte zaal van Cultureel Centrum De Haandert ‘t 35e Oeles Jeugtrio oétgerope waere. ‘t Thema dit jaor is ’t jaorlikse sjpektakel van ’t oetreike van de Academy Awards, baeter bekend as ‘de Oscars’ en auch dit jaor is d’r alles oét de kas gehaold um D’n Haandert-zaal um te tovere in de sjfeer van ‘t filmfestival. Vanaáf 14.00 oor zulle de deure ge-aöpend zien.