Met de 11de van de 11de in ’t veuroétzich, is ’t auch wir haos tiéd veur de niejen Opsjtaeker. De iér is dit jaor aan Venlonaer Ivo Nellissen gegund. Ivo is beej zien ôntwerp van D’n Opstaeker 2024 truugk gegaon nao de basis van de vastelaovend door gewoën “Op die kis te houwe”.
Vergöld waas Ivo wie hae, names de sjtadsdeilvereiniginge, door de veurzitter van Venloosch Vastelaovesgezelschap Jocus gevraog woort um D’n Opsjtaeker vur vastelaovend 2024 te ôntwerpe. Direk waas d’r auch ’t besef det hae heejbeej de meugelikheid had, um zien eige persuuënlikke geveul van vastelaovend in zien ôntwerp te legke.
Ivo: “Die dreej daag, dao drejt ’t um en dao môt ’t um drejje. Zôndaag is génne rösdaag um beej te kômme van de evenemente d’n daag daoveur. Op zôndaag begint ’t pas, det meug bes gezag waere. Sjpaar dich de puf en de pieke en zörrig des-se veural dreej daag vol de vastelaovend kens viere. ’t Geit um de sjaele wazel, d’n optoch, de Boerebroélof, pierewaaije. De vastelaovend geit euver niks en tegeliék euver al wat einen Tegelenaer leef is.
Heejoét is den auch ’t ôntwerp ôntsjtaon, haos as statuut van de vastelaovend: Houwe op die kis (umdet ’t vastelaovend is). ’t Is einen alleszeggende regel oét ’t bekende kouplet det idderein in Groët-Venlo en wiéd dao boéte zellefs nag ken.
“ ’t Sjpraekwaordelikke wilde ich letterlik make, want juus auch dét is de vastelaovend”.
’t Ontwerpproces verleep geleidelik, waobeej ’t idee van de kis langzaamaan de juuste vorm kreeg en same met de voes en de meziék-noëte ’t oéteindelikke resultaat van D’n Opsjtaeker 2024 bereik.
Ivo Nellissen is getrouwd met Marlou en same hebbe zeej 4 kinger. Ivo woort gebaore naeve ’t sjtadhoés baove de winkel en atelier van zien femilie, ein ech Venloos bedriéf det hae same met zien broor Pim in 2014 euvernoom van de generaties veur eur.
Goldsjmeeje en ontwerpe lierde Ivo in Zuud-Duitsland um aansjloétend de Rietveldakademie in Amsterdam te doorlaupe.
Nao vanoét ’t weste van Nederland inkele jaore as zellefsjtendig ontwerper in binne- en boételangk aktief te zien gewaes, kierde Ivo in 2004 truugk nao Venlo.
Zien leefde veur de vastelaovend zit in zien blood en blief hae euverdrage als gewaardeerd lid van de P&P kemmissie van Venloosch Vastelaovesgezelschap Jocus.
D’n Opsjtaeker 2024 wuërt op d’n Elfde van d’n Elfde geprissenteerd. Vanaaf daen datum is hae auch te kaup beej diverse winkels en via de online-kanale van de diverse vastelaovesvereiniginge.
