D’n Opsjtaeker 2026, ein ôntwerp van Tegelenaer Maarten Grob

Met de Liedjesaovend alwir achter ôs, kump de sjtart van ’t nieje vastelaovessezoén rap dônderbeej. Naeve de bekende festiviteite die daobeej huure tiéjes d’n Elfde van d’n Elfde, wuërt auch wir D’n Opstaeker™ vur ’t iërs te kaup aangebaoje. Dit jaor is det ein extra biézôngere gelaegeheid, want ’t is eine echte jubileumeditie: 2 x 11 jaor! Dit jaor velt de iër te beurt aan Maarten Grob oét Sjteyl. In Pannerden zulle de minse toch ein partie gruëts zien! In det iélig dörpke in Gelderland woort 54 jaor geleeje namelijk d’n ôntwerper van dees ziër speciale oétveuring van d’n Opsjtaeker gebaore. Umdet de vader van Maarten viéf jaor later werk kreeg in Bliërick, kwame zeej al vlôt met ’t gezin oppe Hei in Tegele terech. Inmiddels woënt Maarten op Steyl met ziene partner Thekla en euren twiëling van 13 jaor. Al vruug waas Maarten eine kreativeling en dus waas ’t gen verrassing det hae nao de middelbare sjoël op de Kunsakademie terech kwaam. Dao volgde hae de opleiding ‘Visuele Communicatie’. As grafisch vormgaever haet hae daonao beej diverse reklamebureau’s gewerk, veurdet hae veurig jaor

besjloot um veur zichzelf te beginne. Maarten is naeve grafisch vormgaever auch illustrator, maar probeert auch op angere menere zien kreativiteit in te zette. Zoë guëf hae gaer kreative ‘worksjops’ aan kinder en waas hae aafgelaupe jaor ein van de ‘Wijkmakers’ in de Bliërickse wiék Vastenaovendkamp. Same met de bewoëners werkte hae aan ’t door öm bedachte Vlagkeprojek met as doel de saamhuërigheid in de wiék te verbaetere. In Venlo is Maarten auch bekend as d’n teikenaer van ‘Koekwaus’, wao hae ein aantal bukskes van haet gemak en wao noow auch ein leuk niej projek van löp: de Koekwaus Kruumeltoch. Taeves is hae ôngerdeil van teikenaerskollectief Usake Wok, det ônger angere bekend is van ‘Greekbaer’. In Tegele en oppe Hei haet Maarten,al zien zien elders ‘neet van heej’, de vastelaovend van jôngks aaf aan geveerd. Det deej hae, iërs as kingk same met zien elders in Tegele, en later auch tiéjes zien sjtudie in Mestreech. Nao zien sjtudie is d’r auch ein periejode gewaes waobeej vastelaovend wat minder aanzeen genoot, maar taengeswaordigs viert hae ’t wir vaolop, same mit zien gezin of met zien

kammeraöj. In ’t ôntwerp van D’n Opsjtaeker is det ‘same viere’ den auch truugk te zeen. De letters van Vastelaovend zien allemaol as gezichte waergegaeve. Det is de verwiézing nao ’t same met mekaar viere, maar waal idder op zien eige wiés.

D’n Opsjtaeker 2026 is vanaaf d’n Elfde van d’n Elfde verkriegbaar via de samewerkende vastelaovesvereiniginge. Kaup D’n Optsjaeker beej eune Tegelse, den kump de opbrings ten bate van de Tegelse vastelaovend.

Umdet Tegele ôs leef is!