Einem baum met ein QR-code? Zônger verdere teks en oétlegk? Det haet uch bliékbaar niej-sjierig gemak. Gelökkig! Want d’r zit ein sjoën verhaol achter, ein oer-Tegels verhaol!
Wat geej vur uch zeet, is eine Liriodendron tulipifera ‘Aureomarginata’, in de volksmôngk ‘Bônte Tulpenbaum’. Zoë zuut hae d’r in volle bleuj oét
Dezem baum is op 22 juni 2024 door de Sociëteit Oeles Prinse (SOP), de aad-prinse van Vastelaovesvereiniging D’n Oeles oét Tegele, als cadeau aangebaoje aan Bart Faassen, lid van de SOP, en zien femielie-j, ter gelaegenheid van ‘t hônderdjaörig besjtaon van Faassen Plants.
Op 1 fibberwarie 2025 is dezem baum heej gepaot, in dit parkplantsoen aan de Raadhuislaan. Pontifikaal in ‘t centrum, ‘t hert van Tegele, en det is neet vur niks! Dees plek haet ein symbolische beteikenis. Want de femielie-j Faassen haet van aadshaer sjterke wortels in de Tegelse gemeinsjap en sjteit dao neet allein figuurlik maar now dus auch letterlik midden in.
Faassen Plants is ein femieliejbedriéf met ein riéke historie. In 1884 richtte Arnold Faassen – Berg Nölke zoëas gans Tegele öm kôs – een baumkwekerie-j op in ‘t buurtsjap Nabben. Al sjnel sjlote zien vijf zeuns zich beej öm aan. In 1919 besjloot d’n aadste, Willem, vur zichzelf te beginne en al sjnel volgde de veer angere breurs zien veurbeeld.
Zoë sjtartte Bert in 1924 een eigen kwekerie-j ônger de naam Faassen Hekkens. Met succes. ‘t Bedriéf kwaam toet groëtem bleuj en exporteerde toen al planten door gans Europa, veural per trein. Met eige roëzesoarte en vaste plante maar met name de Acer ‘Faassens Black’, eine roei-jen esdoren, zette de florerende ôngernimming zichzelf internationaal en zelfs waereldwiéd oppe kaart. Faassen Hekkens verhoésde later nao Ruiver.
In 1980 koos Bart Faassen d’r in naovolging van zien groëtvader veur um zich auch aaf te sjplitse. Op d’n historische grôngk beej d’m Bas wao opa Bert zien iërste buimkes paotte, ôntsjproot ein niej sjtekje, det sjtevig wortelde en eine explosieve greuj doormakde. Bart Faassen Tegelen BV noom oéteindelik Faassen Hekkens euver en in 2020 woord besjlaote um ônger eine nieje naam same verder te gaon: Faassen Plants.
In 2024 besjtong de femielie-j alliantie hônderd jaor. Umdet ‘t golde jubileum d’r door ‘t euverlijde van vader Noud Faassen in 1974 beej ingesjaote waas, woord ‘t iewfiës groëts en oétbundig geveerd.
Naeve ein sjterke ôndernimersgeis haet de femielie-j Faassen auch van maet aaf aan einen hielen hechtem bangk met ‘t plaatselikke vereinigingslaeve, in ‘t biezônger met de vastelaovend in Tegele. Bert Faassen sjtông in 1937 aan de weeg van Tegels Belang, veurluiper van D’n Oeles, wao hae veurzitter en sirremoniemeister waas van ‘t Oeleskommieté. In 1955 woord Sjraar Faassen oétgerope toet prins van D’n Oeles, twië jaor later gevolgd door Jan Faassen. En metein nao de millenniumwisseling moch Bart Faassen in 2000 de scepter zjwei-je euver ‘t Oelesriék. Ziene zoon Florian woord adjudant in 2020.
Det de femielie-j Faassen al zoë lang versjtrengeld is met d’n Tegelse vastelaovend en D’n Oeles in ‘t biezônger, verklaort auch de keuze vur dees baumsaort. Vanoét de Närrische Europäische Gemeinschaft (NEG), de Europese Vastelaovesbônd, waere lidvereiniginge gesjtiemuleerd um beej jubilea en angere festiviteite einem baum te paote. Um vur de hangk liggende raejene haet Bart Faassen zich opgeworpe as ambassadeur van dit inisjatief; door zien eige roots as ôndernimmer, maar auch vanoét zien funksie as besjteurslid van de Samewirkende Limburgse Vastelaovesvereiniginge (SLV). Door de NEG woort op ziene veursjpraok de Bonte Tulpenbaum met de Latiense naam Liriodendron tulipifera ‘Aureomarginata’ vanwaege zien weelderige bônte bladerprach aangeweze als dé vastelaovesbaum vur gans Europa.
Ein sjônder en toepasselikker jubileumcadeau kôs de Sociëteit Oeles Prinse vur Bart en Marie-José Faassen en eur femielie-j neet bedinke. Dankzij mei-jwerking van de Gemeinte Venlo haet Tegele ein laevend monument as aandinke aan ‘t honderdjaörig besjtaon van Faassen Plants en de riéke Oeleshistorie-j van de femielie-j Faassen, die zônder einige twiefel zal veurtlaeve toet in lengte van jaore.
Of zoëas ‘t Oelesmotto luújt det opa Bert al hoëg in ‘t vaandel had en auch Bart, Jan en Sjraar Faassen same met alle angere aad-Oelesprinse oétdrage:
‘Umdet Tegele ôs leef is!’
NEDERLANDSE VERTALING
Een boom met een QR-code? Zonder verdere tekst en uitleg? Dat heeft u blijkbaar nieuwsgierig gemaakt. Gelukkig! Want er zit een mooi verhaal achter, een oer-Tegels verhaal!
Wat u voor u ziet, is een Liriodendron tulipifera ‘Aureomarginata’, in de volksmond ‘Bonte Tulpenboom’. Zo ziet hij er in volle bloei uit
FOTO
Deze boom is op 22 juni 2024 door de Sociëteit Oeles Prinse (SOP), de oud-prinsen van carnavalsvereniging D’n Oeles uit Tegelen, als cadeau aangeboden aan Bart Faassen, lid van de SOP, en zijn familie, bij gelegenheid van het honderdjarig bestaan van Faassen Plants.
Op 1 februari 2025 is de boom hier geplant, in dit parkplantsoen aan de Raadhuislaan. Pontificaal in het centrum, het hart van Tegelen, en dat is niet voor niets! Deze plek heeft een symbolische betekenis. Want de familie Faassen heeft van oudsher sterke wortels in de Tegelse gemeenschap en staat daar niet alleen figuurlijk maar nu dus ook letterlijk midden in.
Faassen Plants is een familiebedrijf met een rijke historie. In 1884 richtte Arnold Faassen – Berg Nölke zoals heel Tegelen hem kende – een boomkwekerij op in de buurtschap Nabben. Weldra sloten zijn vijf zonen zich bij hem aan. In 1919 besloot de oudste, Willem, voor zichzelf te beginnen en al spoedig volgden de vier broers zijn voorbeeld.
Zo startte Bert in 1924 een eigen kwekerij onder de naam Faassen Hekkens. Met succes. Het bedrijf kwam tot grote bloei en exporteerde toen al planten door heel Europa, vooral per trein. Met eigen rozensoorten en vaste planten maar met name de Acer ‘Faassens Black’, een rode esdoorn, zette de florerende onderneming zichzelf internationaal en zelfs wereldwijd op de kaart. Faassen Hekkens verhuisde later naar Reuver.
In 1980 koos Bart Faassen er in navolging van zijn grootvader voor om zich eveneens af te splitsen. Op de historische grond bij kasteelvijver D’m Bas waar opa Bert zijn eerste boompjes plantte, ontsproot een nieuw stekje, dat stevig wortelde en een explosieve groei doormaakte. Bart Faassen Tegelen BV nam uiteindelijk Faassen Hekkens over en in 2020 werd besloten om onder een nieuwe naam samen verder te gaan: Faassen Plants.
In 2024 bestond de familie-alliantie honderd jaar. Daar het gouden jubileum er door het overlijden van vader Noud Faassen in 1974 bij ingeschoten was, werd het eeuwfeest groots en uitbundig gevierd.
Naast een sterke ondernemersgeest heeft de familie Faassen ook van meet af een zeer hechte band met het plaatselijke verenigingsleven, in het bijzonder met de vastelaovend in Tegelen. Bert Faassen stond in 1937 aan de wieg van Tegels Belang, voorloper van D’n Oeles, waar hij voorzitter en ceremoniemeester was van het Oelescomité. In 1955 werd Sjraar Faassen uitgeroepen tot prins van D’n Oeles, twee jaar later gevolgd door Jan Faassen. En meteen na de millenniumwisseling mocht Bart Faassen in 2000 de scepter zwaaien over het Oelesrijk. Zijn zoon Florian werd adjudant in 2020.
Dat de familie Faassen al zo lang verstrengeld is met de Tegelse vastelaovend en D’n Oeles in het bijzonder, verklaart ook de keus voor deze boomsoort. Vanuit de Närrische Europäische Gemeinschaft (NEG), de Europese carnavalsbond, worden lidverenigingen gestimuleerd om bij jubilea en andere festiviteiten een boom te planten. Om voor de hand liggende redenen heeft Bart Faassen zich opgeworpen als promotor van dit initiatief; door zijn eigen roots als ondernemer, maar ook vanuit zijn functie als bestuurslid van de Samewirkende Limburgse Vastelaovesvereiniginge (SLV). Door de NEG werd op zijn voorspraak de Bonte Tulpenboom met de Latijnse naam Liriodendron tulipifera ‘Aureomarginata’ vanwege zijn weelderige bonte bladerpracht aangewezen als dé carnavalsboom voor heel Europa.
Een mooier en toepasselijker jubileumcadeau kon de Sociëteit Oeles Prinse voor Bart en Marie-José Faassen en hun familie niet bedenken. Dankzij medewerking van de Gemeente Venlo heeft Tegelen een levend monument als aandenken aan het honderdjarig bestaan van Faassen Plants en de rijke Oeleshistorie van de familie Faassen, die zonder enige twijfel zal voortleven tot in lengte van jaren.
Of zoals het Oelesmotto luidt dat opa Bert al hoog in het vaandel had en ook Bart, Jan en Sjraar Faassen samen met alle andere oud-Oelesprinsen uitdragen:
‘Umdet Tegele ôs leef is!’
