Faes I Faassen niej-je jeugprins van D’n Oeles.

Faes I Faassen vormp same met zien Adjudante Flip Faassen en Mase Smeets ‘t 35e jeugtrio van Vastelaovesgezelsjap D’n Oeles oét Tegele. Zeej zien zôndigmiddig 01 fibberwarie door door Oelesvors Frank Rijvers geproklameerd in de groëte zaal van Kultureel Centrum De Haandert.

Jeugprins Faes I is 11 jaor aad en woënt same met ziene pap Rowan, mam Sandra, zuske Sofie en eure hóngk Olly aan d’m Bas in Tegele. De niej-je prins zit in groep 8 van basissjoël St.Jozef  beej juf Femke, juf Rian en meneer Gé. Nao sjoël geit Faes gaer geliék boéte sjpeule. Voetballe (in d’n haof of op het veld beej TSC Irene), sjteppe en op de trampoline sjpringe, duit hae ’t leefste.

De jeugprins is tiédes de vastelaovend altiéd op paad met vrinde. Fiëste in de Harmoniezaal, d’n Haandert en als hoëgtepunt mei-j met Sókkerpáek op de wage in de Tegelsen optoch.

Vastelaovend is úm met de paplaepel ingegaeve. Altiéd mei-j, altiéd d’rbeej. Ziene pap en opa sjpeule allebei beej Joekskepèl Sókkerpáek. Opa Bart waas prins in 2000, twië oëmes Bram en Florian zien adjudant gewaes in 2020 en 2024. Auch zien zuske Sofie zit beej de dansgarde van D’n Oeles. Toen aafgeloupe jaor Faes ziene kammeraod Juup jeugprins woort, begós ‘t toch waal get te kriebele. ‘Det liek mich auch waal get’, maar… wie geit zoëget? Maar det had Faes flot door. Op de vraog of Faes jeugprins van D’n Oeles wól waere, had hae aevel waal drek ein antwaord klaor: “JAO!”

En nôw kump einen druim van úm oét. Hae is dit jaor de jeugprins van D’n Oeles!

Adjudant Flip is 10 jaor en woënt same met pap Florian, mam Jessie en breurke Joppe als buurjông van Jeugprins Faes aan D’m Bas. Hae is neet allein buurjong van Faes, hae is auch zien naefke. Flip traejt als adjudant in de vootsjpaore van ziene pap Florian, dae in 2020 adjudant waas van het Oelestrio. Ôzze adjudant zit in groep 7 beej juf Rianne en juf Loes op basissjoël St.Jozef. Hae is gaer boéte um lekker te voetballe, op de trampoline te sjpringe of gewoën te sjpeule.

Flips groëte hobby is voetballe. Hae sjpeult zelf beej TSC Irene in J011-2 en vingk ’t heerlik um same met zien teamgenootjes te traine en wedsjtriéde te sjpeule. Auch is Flip aaf en toe met ziene pap in ’t Philips stadion te vinge, as fan van PSV of in d’n Koel sjteit hae met angere vrinde op O.

Eine kiër per jaor geit Flip, same met Faes en de res van de femielie-j op ski-verkansie-j. Hae geniet den van de gezelligheid same, maar ’t skie-j-je zelf vingk Flip auch ech sjiek um te doon.

Vastelaovend viert de kersverse adjudant gaer. Met optochgroep ‘V.G. De Paradepaerdjes’ trek hae al sinds zien iërste laevesjaor mei-j in de Venlosen optoch. In Tegele is hae same met zien breurke Joppe vaste gas beej ‘t Jeugprinsebal en ’t Ranjabal.

Adjudant Mase is 11 jaor en woënt op Sjteyl, same met pap Maikel, mam Moniek, zuske Mikki en zien kleine breurke Mex. Zeej waere den auch waal dökker de ‘emme’tjes’ geneump.

Mase zit op basissjoël de Schalm, of Sjalm tiédes in de Vastelaovestiéd, in groep 8 beej juf Paula. Boéte sjoël helt dezen adjudant d’rvan um lekker boéte te sjpeule met zien kammeräö-j. ‘t Leefs trap Mase den ‘n belke op ‘t pannaveldje, of sjpring hae ein gaat in de lóch oppe trampoline. As ‘t neet zô’n fijn waer is, vingk hae ‘t auch waal leuk um ein sjpelke te sjpeule op de Nintendo Switch. En as trouwe fan van VVV-Venlo wuërt auch iddere thoéswedsjtriéd De Koel bezôch.

Dreej kiër per waek kent Mase zien enerzjie-j kwiét op ’t voetbalveld beej Sjportklöp Irene, taegewaordig TSC Irene. Dao voetbalt hae in de JO 12-1, same met prins Faes. Beej ‘t voetballe heb ich auch adjudant Flip liëre kenne.

Ȏzze nie-jje adjudant haet al vruug kennis gemak met de Vastelaovend. Zoë waas Mase met 3 jaor al prins beej de kingeropvang Van Harte en as Sjteyler jông is hae al ein paar jaor lid van de Kaetelkidzzz van De Kaetelaers. Wat tof is, is det zienen oëme Yannick in 1998 auch al ens adjudant waas in ‘t jeugtrio van D’n Oeles.

Same met eur twië dansmarietjes Pomme en Pleun lei-jje zeej de jôngste inwoëners van ’t Oelesriék door de Vastelaovend ônger eur motto: “Nôw efkes gen voetballe, want weej gaon deze Tegelse vastelaovend knalle!”

’t Oeles’ jeugtrio helt op zôndig 8 fibberwarie vanaaf 14.00 oor resepsie-j in de kleine Haandertzaal in Tegele.