Wao d’n Oelesprins op zaoterdaág woort gepresenteerd aan Tegele, zal d’n heerser van de Tegelse jeug de zenuwe einen daág langer in bedwang môtte haaje. Zoë-as gebroekelik wuërt namelijk op de zondaág nao Prinsebal ’t niej-je jeugtrio van Vastelaovesgezelschap D’n Oeles bekend gemak.
Op zondaág 5 fibberwarie 2023 zal in de groëte zaal van Cultureel Centrum D’n Haandert ‘t 32e Oeles Jeugtrio waere oétgerope. ‘t Thema dit jaor is Sirkus en d’r is den auch alles oét de kas gehaold um D’n Haandert-zaal um te tovere toet ein echte Sirkustent met ein programma vol dans muziek en sjpektakel. Vanaáf 14.15 oor zulle de deure geöpend zien. ‘t Programma is samegesjteld door de jeugkemmissie en Oeles Toekoms en zeej zulle wir einen hiele leuke middaág vur de jeug van Tegele presentere. Zoë zulle de dansgardes van D’n Oeles eur danse tuëne en zal d’r gehos kenne waere oppe klanke van ôzze Sirkus-DJ en Oeleskepel Tegels Blood. Auch zal Rokke Billy deze middaág ein magische sjoow neerzette, waorbeej hae ‘t Oeles Jeugtrio 2023 de zaal in tovert um daornao auch nag de zaal muzikaal op sjtelte te zette. De entree-j vur deze middaág bedruëg 2,50 Euro en kinger met Opstaeker hebbe gratis toegang.
