Juup I Thijssen vormp same met zijn Adjudante Giep Schatorjé en Vince Gielen ‘t 34e jeugtrio van Vastelaovesgezelsjap D’n Oeles oét Tegele. Zeej zien zôndigmiddig 16 fibberwarie door door Oeles Toekôms Moelemeister Rick Theunissen geproklameerd in de groëte zaal van Kultureel Centrum De Haandert.
Det ’t fiës zal zien in hoéze Thijssen is neet gek. Vader Loek woort immers twië waeke gelee-je as Adjudant gepresenteerd beej De Beerpiëp. Jeugprins Juup I is 11 jaor en woënt same met ziene pap, mam Marijke, zuske Jasmijn en broor Teun op de Aaj Mertsjtraot in hertje Tegele. De prins zit in groep 8 van basissjoël ‘t Maasveld. De jeugprins’ groëte passie is muziek make, en waal op de trôm. Neet vraemp netuurlik, as papa Loek sjlaagwerker is beej Joekskepèl Sôkkerpáek en hae geit den auch dök mei-j op paad. Juup is auch lid van harmenie-j Sempre Avanti en sjpeult zoëwaal in ‘t jeugorkes as in ’t harmenie-j orkes. Daarnaeve voetbalt hae gaer boéte en geit-e met vuël plezeer same met klasgenootjes nao Toverland.
Adjudant Giep is 12 jaor en woënt al zijn ganse laeve aan de Industriesjtraot same met pap Tom Schatorjé, mam Iris Vercoulen en zuske Madelief. Hae traejt in de vootsjpaore van zien groëte zus, det in 2023 bruudje waas beej de Boereraod. Ook Giep zit, net as hoëgheid Juup, in groep 8 van ’t Maasveld. Voetbal is ein hiele groëte hobbie-j van úm. Hae voetbalt met vuël plezeer bij Belfeldia wao ziene oét Belvend aafkomstige pap auch nag voetbalt. Same gaon ze geregeld nao Venlo um in De Koel nao VVV te gaon kiéke. Verder sjpeult Giep toniël beej Puur Theater Ruiver en geit-e dök d’roët met de verrekiéker um veugel te sjpotte.
D’r is aevel auch nag genôg tiéd euver um te geeme en aaf te sjpraeke met vriendjes en klasgenootjes.
Adjudant Vince is 11 jaor en woënt op Sjteyl, same met pap Rob Gielen, mam Franca Peulen en is groëte broor van Raff en Moon. 365 daag per jaor is de femielie-j Gielen met Vastelaovend bezig. ‘t Is den auch neet vraemp, det in 2023 pap en mam ’t Jubileejum Broédspaar ware van de Boereraod. Zelf is Vince al vanaaf de gebaorte lid van De Boereraod en woort aafgeloupe november nag gehuldig met de zilvere klômp. Auch is-e lid van “Wie Laater Wie Zaater” en löp dao jaorliks met mei-j in d’n Tegelsen optoch. Verder is voetbal zien grôtste hobbie-j. Hae sjpeult in de JO13-4 van Sjportklöp Irene en geit taeves gaer nao VVV toe. Iddere woensdig krieg Vince gitaarles en haet as druim um oei-jt met vrunde in ‘nne band te sjpeule. Auch hae zit in groep 8 van ’t Maasveld. En hae is gaer te vinge op de kemping of oppe Patersplak en wanniër hae neet te vinge is, den is Vince binne ‘nt geeme.
Same met eur twië dansmarietjes Saar en Veerle lei-jje zeej de jôngste inwoëners van ’t Oelesriék door de Vastelaovend ônger eur motto: “Heej bön ich, Juup de Prins, same met mien adjudante, Giep en Vince!”
’t Oeles’ jeugtrio helt op zôndig 23 fibberwarie vanaaf 14.00 oor resepsie-j in de kleine Haandertzaal in Tegele.
