Lintjesraegen!
Ziene Majesteit keuning Willem Alexander haet ‘t behaag um dreej hiére met bizóngere verdeenste vur vastelaovesgezelsjap D’n Oeles en de Tegelse vastelaovend te beneume toet Lid in de Orde van Oranje Nassau. ( Foto’s gemaakt door Renier Linders)
Gé Cornet
Gé Cornet, aad-Oelesprins en aad-Oelesvors, is eine zier aktieve vereinigingsman en vreejwilliger dae midde in de Tegelse gemeinsjap sjteit.
Zoe waas hae jaorelangk in diverse funksies aktief binne Scouting Tichlouw en ouch ein van de kertrekkers van Sjpaarkas ut Kretje, dae vanoét de scouting is óntsjtaon en as wagebouwersgroep dök haet meijgetrokke in de Tegelse vastelaovesoptoch.
Daonaevebeej waas Gé ouch lange tiéd aktief lid van de jeugkemmissie van vastelaovesgezelsjap D’n Oeles en meij verantwaordelik vur ‘t Oelesjeugtrio.
In 2006 woord Gé Cornet oétgerope toet Oelesprins van Tegele. Same met zien adjudante Henk Haenraets en wijlen Frenk Breuer vormde hae ’t prinselik trio. Nao dae vastelaovend sjloot hae zich metein aan beej de Raod van Ellef van D’n Oeles.
Vanaaf 2010 twies 2019 waas hae Oelesvors, in die funksie haet Gé in totaal nege prinselikke Oelestrio’s oétgerope. Hae is daonao beneump toet iëre-vors van D’n Oeles.
Nao zien vorsperiode woord Gé as vreejwilliger aktief vur ‘t Limburgs Sjötterie Museum in Steyl.
Ouch woord hae veurzitter van de Oelessenaat, ein klöb van manne met eine respektabele staot van deens binne D’n Oeles en de Tegelse vastelaovend.
In 2024 is hae beneump toet veurzitter van de Sociëteit Oeles Prinse, de aad-prinse van D’n Oeles.
Vanaaf 2008 is Gé aangesjlaote beej wienclub Les Amis du Bon Vin, eine groep van 10 manne die op professionele basis wiene preuve, beoërdeile en netuurlik geniete.
Kortom, eine man met groëte verdeenste vur de gemeinsjap dae terech beneump is toet Lid in de Orde van Oranje Nassau.
Theo Verheijen
Ouch aad-Oelesprins Theo Verheijen is genne onbekende in Tegele en groeët Venlo.
Zoe waas hae in 1996 Prins van ‘t Tegelse Oelesriëk, woëbeej hae tiedes vastelaovend same met zien adjudante Hein Jacobs en Sieb Sijbers veurging ônger eur motto ‘Same luchkesjtiële bouwe’.
Theo Verheijen is daonaeve jaorelangk as jurylid van de Tegelse optoch aktief gewaes en waas ouch betrokke beej de optochhal van groeët Venlo.
Vaerder is hae lange tiéd veurzitter gewaes van botanische tuin De Jochum-Hof in Steyl. Beej VV De Kaetelaers oet Steyl vervölde hae ach jaor langk de rol van besjermhier.
Taegeliekertied waas Theo Verheijen sikkertaris van de Sociëteit Oeles Prinse (SOP).
Maatsjappelik waas en is Theo nag sjteeds betrokke beej tal van projekte in en ouch boéte Tegele.
Zoe waas hae ein van de inisjatiefnimmers en driévende krachte achter de groëtsjeepse renovasie van de verniejde Harmoniezaal aan de Poshoéssjtraot. Ein en anger waas meugelik met dank aan eine anonieme weldoener dae dit pand haet gesjonke aan de sjtichting SCET, wao Theo ouch deil van oét mak as sikkertaris. Momenteel kriég dit projek ein vervolg met de aanbouw van ein groëte ruumte achter de groëte zaal.
Vur al zien verdeenste is Theo Verheijen terech beloënd en ge-iérd met ein
keuninklikke ôngersjeiding
Herman Denessen
Herman Denessen is vanaaf 1989, ’t jaor woë-in hae same met René Luyten as adjudant van Prins Leo Benders deil oétmakde van ’t Oelestrio, as vreejwilliger aktief beej vastelaovesgezelsjap D’n Oeles. Veurhaer waas hae al betrokke beej de Oelesrevues die in de jaore 80 en 90 op de plenk woorte gezatte, ónger mier as sjpeuler en besjteurslid.
In 1989 sjloot Herman zich aan beej de kemmissie Pers & Promosie, woë-van hae ouch eine tiéd lang veurzitter is gewaes.
Van 2002 wies 2013 is hae lid van de Raod van Ellef gewaes. In die periode had hae miérdere funksies. Zoe waas hae sikkertaris van de muziekkemmissie en veurzitter van de joekskemmissie. Ouch waas hae inisjatiefnimmer en veurzitter van de dialekkemmissie. Vur zien vreejwilligerswerk kreeg hae in 2009 de Orde van Verdeenste van D’n Oeles en van de Samewerkende Limburgse Vastelaovesvereiniginge (SLV).
Van 2011 wies 2021 waas Herman veurzitter van de kemmissie Oeleswebsite, woë-veur hae nag altiéd aktief is. Op de site haet hae ónger mier de historie van de vereiniging oétgebreid in kaart gebrach.
In 2020 haet Herman zich aangesjlaote beej de Senaat van D’n Oeles. Vanaaf 2021 mak hae deil oét van de kemmissie óngersjei-inge. Daonaeve is hae 18 jaor sikkertaris van de Vereinigde Oeles Adjudante (VOA) gewaes.
Vur zien enorme sjtaot van deens haet Ziene Majesteit de keuning um zier terech beloënd met ein keuninklikke óngersjei-ing.
