Op zôndaag 26 oktoëber 2025 waar de Harmoniezaal ’t dekor vur de euverdrach van ’t letste Oelestrio nao de Sociëteit Oeles Prinse (S.O.P.) en de Vereinigde Oeles Adjudante (VOA).
Nao ’t äöpeningswaord door Oelesveurzitter Cor Jansen hadde Gé Cornet (S.O.P.) en Thijs Konings (VOA), de iër um de talriék aanwezige aad-prinse en aad-adjudante, eur partners en alle angere aanwezige toe te sjpraeke. Netuurlik wir op ’n ludieke wiéze, waodoor d’r hiel get aafgelache woort. Alles vural gerich aan ’t adres van de sjeidende prins Stan-Mark 1 Berden en zien adjudante Erwin Vesseur en Peter Verbeek.
Vervolges woorte de hiëre opgenaome in allebei de Gezelsjappe. Ze woorte gedekoreerd met ’t felbegeerde SOP- en VOA kruuts en daomei-j toet in lengte van jaore verbônge aan dees twië vereiniginge. Dees sjoëne uuterlikke teikens van waerde woorte vergezeld van persuënlikke oorkondes. De dreej sjarmante dames van ’t trio ôntvinge nag ein sjoën boeket bloome. Met ein optraeje van Thei & Marij waas auch de muzikale omliejsting good verzurgd.
