Nôw de niej-je liedjes van kômmend jaor weer bekend zien, kenne weej aaftelle nao de äöpening van ein niej vastelaovesseizoén. Beej dae sjtart op d’n Elfde van d’n Elfde wuërt neet allein ’t niej-je vastelaovesseizoen op gang gesjaote, maar is auch de niej-jen Opsjtaeker verkriégbaar. Ein sieraod, det inmiddels ônmisbaar is vur idderein in de gemeinte Venlo, dae de vastelaovend ein werm hert toedruëg. Dit jaor is gekaoze vur de kreatieve doézendpoët Albert Kiefer.

Albert zoog ’t laevesleech op Steyl, maar woort al flôt mei-jgenaome nao Belvend. Dao haet hae ruum 35 jaor gewoënd, vurdet hae oéteindelik in Bliërick terech kwaam.

Albert is getrouwd met Niek, “ ’t maedje van Sounds”, en same hebbe zeej twië kinger, Bodi en Ivy. Nao zien middelbaar ôngerwiés en ein jaor in deens, is Albert aan de sjlaag gegaon op de kunsakademie in Mesjtreech. Teikene waas in zien jongste jaore de grôtste hobby, en Albert koos d’r veur um nao de kunsakademie te gaon. Op good bedoeld advies van zien mam, haet hae dao oéteindelik de richting van liëraar gekaoze, “want den haes-se miër zekerheid jông”.

Eine videoclip van de Dire Straits wakkerde aevel ein vlemke aan, um toch get angers den lesgaeve te gaon doon. Eine clip, dae gemak waas via de kompjoeter. Dét waas dé trigger vur Albert: hae is inmiddels al jáóre professjoneel grafikus (al flôt as zelfstandige) met ônger angere prachtige opdrachte as ’t ontwikkele van ein visualisaasie-j van ’t aaj-je Fort Michel en ’t grafiesverbeelde van ein nie-j legermobiel vur defensie. Heejbeej sjteit grafiese nauwkeurigheid in ein hoëg vaandel.

In 2016 kwaam de heimwee nao ’t aajerwets teikene. Hae begôs opnie-j, net wie vruuger, met ein sjetsbook en get kleurkes. Met zelfopgelagde discipline (idderendaag ein teikening) kreeg dae hobbie-j nie-j laeve, Ein hobbie-j met groëte gevolge: waereldwiéd wuërt-e gevraog vur kursusse en d’r is zelfs ein book van zien kreaasie-js. Det is met vural gerich op unieke sjetse van gebouwe, vurnamelik binne de gemeinte Venlo. En daomei-j teikende hae zichzelf “in de piksjer” van D’n Opsjtaeker.

Angers den angere jaore haet de niej-je ontwerper iërlik gezag neet zoëvuël met vastelaovend. Vruuger as kingkwaas hae waal gaer te zeen as kojboj en superheld.Maar daonao verwaterde det. Tóch ken hae ’t geveul van vastelaovend prachtig belaeve én oétbeelde: dét bliek oét ’t ontwerp van D’n Opstaeker 2025. Twië waerelde kwaame heejbeej same (grafies en sjets), detresulteerde in ein prachtig 3D- ontwerp van ein hieljoeksig sjpeldje, wao iddere vastelaovesvierder zich beej aan ken sloéte