Net as de aafgeloupe twië jaor hebbe Oeles Toekoms en de jeugdkemmissie-j van Vastelaovesgezelsjap D’n Oeles de heng wir in mekaar gesjlage en zulle zeej ‘t Ranjabal organizere. Op vastelaoveszôndaág 2 maart 2025 zal in de Harmoniezaal in hertje Tegele ein fiëstje gebouwd gaon waere vur de jeug. In de Harmoniezaal kenne de jôngste vastelaovesveerders in einen ôngedwônge sfeer ranja drinke en sjôkke. Auch aan de oma’s en opa’s is gedach; de organizasie-j zörrig vur genôch zitgelaegenheid. Tiejens ‘t Ranjabal, det um 14.00 oor sjtart (zaal aope vanaáf 13.30 oor), zal de meziek waere verzörrig door DJ Rens en zulle d’r versjillende optraejes van de dansgroepe van D’n Oeles en VV De Boereraod te zeen zien. Dao naevebeej is ‘t nieje jeugtrio van D’n Oeles vanzellefsjpraekend van de partiej. De middaág deurt toet ôngeviër 17.00 oor en is gratis te bezeuke.