Nao twië jaor zónger prinselik Trio haet ’t Tegelse Oelesriék wir ‘nne niej-je heerser. Oelesvors Roy Peters sjtelde ’t Trio vur dit jaor zaoterdaagaovend 4 fibberwarie veur tiédens ’t Prinsebal in cc. De Haandert.
Prins Rob II (Friesen) geit de kómmende twië waeke, same met zien adjudante Senn Friesen en Bart Tomlow veurop in d’n Tegelse vastelaovend. Ein uniek trio, umdet vur ’t iërs in de historie van ’t vastelaovesgezelsjap vader én zoon same deil oétmake van ’t dreejsjpan.
De naam van de 55-jaorige Rob Friesen woort al langer geneump in ’t geruchtesirkwie-j, maar toet angerhalf jaor gelee-je waas de tinkel ‘nne gok. Nôw is daen druim dus oétgekómme nao miër as 1000 daag zónger Oelesprins. Vanaaf Prinsjesdaag 2021 haet dit nie-jbakke trio gedöld mótte oefene. Maar volges de niej-je Hoëgheid had det lange wachte auch ein groët veurdeil: want daodoor hebbe zeej same met de prinsekemmissie-j leefs twië jaor veurpret gehad en auch dét is uniek in de Oelesgesjiedenis.
Prins Rob II (Friesen) is gebaore in Tegele. Hae wo”:ent same met zien vrouw Elles op de rangk van Tegele en Sjteyl en is vader van adjudant Senn (22) en dochter Evie (20). In ’t dageliks laeve runne hae en Senn same ’t marketingburo We4Media, det gevestig is aan de Hakkessjtraot in Venlo. Eur werk besjteit vural oét ’t bouwe van websites en webshops en ’t bedeene van ’n groëte mert met online marketing.
In ’t verleej-je voetbalde de prins beej Tiglieja en Sjportklöp Irene. Daonaeve haet-e miër den dertig jaor getennis beej TLTC in Tegele. Momenteel vult-e ziene vreejen tiéd met golfe in Baolder en taofeltennisse beej de plaatselikke TTC. Aktief bezig zien is auch absoluut nuëdig, aangezeen Rob taeves helt van feesjes bouwe en oét aete met kammeräö-j. Rob haet auch ein zjwaak vur voetbalklöp Liverpool. Dét nump-e zelfs zien twiëde leefde.
Adjudant Senn Friesen (22) is auch gebaore in Tegele en naeve zoon auch zakelikke kompanjon van zien vader, Rob-1. Sins angerhalf jaor woënt-e in Venlo, maar zien hert klop vur Tegele. Binne d’n Oeles is Senn euveriges gennen ónbekende, umdet-e inmiddels al viéf jaor deil oétmak van Oeles Toekoms. Daonaeve vormp-e de helf van ’t fiës-duo Non Des Jus, en sjteit-e geregeld achter de drei-jtaofel wanniër-e neet met vrunde op sjtap is. Taeves is Senn, dae in ’t verleej-je nag ’n belke trapde beej Sjportklöp Irene, eine fanatieken aanhanger van Ajax.
Adjudant Bart Tomlow (56) is gebaore in Venlo, opgegreu-jd in Bliërick, maar al tig jaor woënèchtig in Tegele met zien echgenote Inge en dochter Fleur. Bart is ruum 27 jaor werkzaam in de verpakkingsindustrie. Iërs in Nederland, maar taengewaordig as adviseur en verkoup boétedeens vur de Duitse firma Carl Eichhorn KG, net euver de grens in Jülich. Zien groëte passie is wielrenne. As lid van wielerklöp PuurSpanje en Cycling Team Limburg, is Bart geregeld op toer door ‘t Limburgse langk of op de wielerbaan oppe hei in Venlo. In 1978 was hae al ens jeugprins beej drumfanfare De Bliërickse Herte, terwiël in detzelfde jaor vader Frans adjudant waas bij de Wortelepin in Bliërick. De prins en adjudant Bart kenne elkaar al miër as dertig jaor en auch de dames hebbe good kóntak met-ein.
‘t Motto van ‘t Oeles Trio 2023 luudt: “Scroll all uch zörg vurbeej, vur vastelaovend……KLIK HEEJ!” Met ein knipoug dus nao ’t werk van Prins Rob en adjudant Senn. Op zóndaag 12 fibberwarie helt ’t kersverse trio resepsie-j in Kultureel Centrum De Haandert tösse 14.30 en 18.00 oor.
