Sjleuteleuverdrach en STV Hoëghede Treffe
Inmiddels auch neet miër weg te dinke in d’n Tegelse Vastelaovend is de sjleuteleuverdrach ein waek nao ‘t oétkômme van ’t niej-je Oelestrio. Zoë zal dit in 2023 plaatsvinge op zaoterdaág 11 fibberwarie in Sjatoo Holtmühle.
Ônger toezeend oug van börgemeister Scholten, van de gemeinte Venlo, zulle de STV-vereniginge D’n Oeles en de De Boereraod op gepasde wiés aankômme beej de Holtmühle waonao de sjleutel van Tegele aan dé nie-jen Oeles Prins wuërt euverhandig.
Daornao vervolg ‘t hiele gezelsjap de reis nao Sjteyl wao in ‘t Sjötteriemuseum vur ‘t iërs het STV Hoëghede Treffe plaats zal vinge. De veer vereniginge hebbe namelijk besjlaote um neet miër beej ein oppe reseptie te kômme en in plaats daovan op een niej evenement saame mekaar te felisitere.
