Prins Stan-Mark I (Berden) geit de kômmende twië waeke, same met zien Adjudante Erwin Vesseur en Peter Verbeek veurop in d’n Tegelse Vastelaovend. Oelesvors Frank Rijvers sjtelde ’t Trio vur dit jaor zaoterdaagaovend 15 fibberwarie veur tiédens ‘t Prinsebal in Kultureel Centrum De Haandert.
Prins Stan-Mark I (Berden) is 4×11 jaor geleej-je gebaore in Tegele en later opgegreu-jd in Baolder. Sins 2006 wir truuk gekômme nao Tegele, wao hae met zien echgenote Joyce en eur twië zeuns Sem en Sjuul aan d’n Erkenkamp woënt. In ‘t dageliks laeve werk de Hoëgheid als Sales Engeneer beej de firma Chemelex, fabrikant van elektriese verwermings–systeeme. Stan-Mark is gaer te vinge in de sjportsjoël um te boekse of te fitnesse en hae helt auch vuël van de vissjport. Taeves is-e as vreejwilliger betrokke beej Sportklöp Irene, wao hae naeve trainer van de JO15-3 en JO17-3 auch lid is van de jeugkemmissie-j. Verder is Stan-Mark besjteurslid beej ‘t Venlose evenement “Puur in ’t Park”.
Adjudant Erwin Vesseur (52) woort gebaore in Venlo, maar verhoésde al flot nao Tegele. Sins 2000 woënt-e same met partner Susanne en de twië zeuns Joey en Vince aan de Sjteylerstraat. Al haos 30 jaor is Erwin werkzaam binne de finansjeele bransj en inmiddels viéf jaor sjtolze eigenaar van De Hypotheekshop–Venlo. Hij zuut dit neet as werk, maar as hobbie-j. Angere leefhebberie-je zien same met vrunde en ziene pap naar de Formule 1 kiéke, Moto–GP en Feyenoord. Erwin toert auch zelf hiel gaer op ziene Ducati en vastelaovend viere sjteit taeves prominent op zien programma. Ziene zoon ging úm in de rol van Adjudant al veur beej ‘t Oelesgezelsjap. Hae waas in 2018 Adjudant beej Jeugprins Sem II, Hermans.
Adjudant Peter Verbeek (57) is einen echte Venlonaer, wao zien elders vruugeraan ’t Nolensplein kefee Prins Hendrik besjtierde. Maar is inmiddels 24 jaor woënechtig met zien ech Tegels maedje Diana en zoon Bob aan de Sint Jozefsjtraot. Hae gaet zoonleef achternao, aangezeen Bob in 2015 Adjudant waas beej jeugprins Jur–I Verstegen. In ‘t dageliks laeve is Peter vanaaf de äöpening in december 2022 werkzaam bij Kees Smit Tuinmeubelen als verkoupadviseur. Al 17 jaar is Peter lid van De Beerpiëp, waar hae 11 jaar raodslid, Chef du Protocol en en auch besjteurslid waas. Taengewaordig is-e veurzitter van de Ambassadeurs, de Sociëteit van aadgedeende. Verdere hobbie-js zijn skie-je, tennisse en geregeld lekker oét aete en ’t jaorlikse oétsjtepke met de Mallorca-klöp.
Dit Trio ken zich vanoét zustervereiniging De Beerpiëp, wao ze zestiën jaor gelee-je met–ein kennis makde. Eine sjoënen tiéd wao-in zeej destiéds al tig joeks en jen belaefde. Auch nao d’n aktieve tiéd binnede Raod van Elf bleef ’t kôntak besjtaonen treffe ze zich same met de maedjes regelmaotig.
‘t Motto van het Oelestrio 2025 luudt: “As vastelaovendvrunde viere weej ’t laeve. Laot uch zeen, weej gaon met uch ‘nne joeksigen tiéd belaeve!’’ Op zôndaag 23 fibberwarie helt ‘t kersverse Trio zien resepsie-j in Kultureel Centrum De Haandert tösse 15.0 en 18.00 oor.
