D’n elfde van d’n elfde ligk inmiddels achter ôs en Sinterklaos is bekans in ‘t langk. Dees periode is dök auch ‘t sjtartsein um de veurbereidinge op te sjtarte vur d’n Tegelsen optoch. In 2024 sjteit deze op maondaág 12 fibbewarie op ‘t pergram.
De optochtkemmissie van Vastelaovesgezelsjap D’n Oeles haet aevel neet sjtil gezaete de letste maonde en is al bezig met de niej-jen optoch. Zoë haop me wir vuël deilnimmers te verwelkômme in 2024.
Vanaáf nôw ken me oppe site van D’n Oeles (https://oeles.nl/evenemente/groeete-optoch/ miër informasie-j vinge met daorbeej auch ‘t insjriefformulier. ‘t Motto van 2024 is “Dao kump-se mei-j binne” en dit motto kenne de deilnemers wir gebroeke vur eur prachtige kreasies.
Heb geej nag eventuwele vraoge den kent geej kontak opneme met de optochtkemmissie-j van D’n Oeles via optocht@oeles.nl.