Prins Tommy I (Vostermans) geit de kómmende twië waeke, same met zien adjudante Bram Hasselmann en Dennis Klompmakers veurop in d’n Tegelse vastelaovend. Oelesvors Roy Peters sjtelde ’t Trio vur dit jaor zaoterdaagaovend 27 jannewarie veur tiédens ’t Prinsebal in cc. De Haandert.
Prins Tommy I (Vostermans) is gebaore in Tegele op de Bergsjtraot. Hae woënt same met zien vrouw Marieke Breuer in ’t centrum van Tegele en is vader van dochters Milly-Ann (10) en Vesper (8) en zoon Nyo van 5 jaor. In ’t dageliks laeve runt hae same met kompanjon Sjuul Driessen ‘t interieurbouw bedriéf Tosj Houtmaatwerk, gelaege op ’t industrieterrein van Belvend. Zeej make interieursjtökke van ingkele eksemplare toet komplete inrichtinge van woënhoés en óngerneminge. Tommy geit gaer met ’t ganse gezin naor Toverland en is vaak te vinge beej hockeyklöp Delta Venlo waor zien vrouw en de kids hockeye. Same met zien vrouw Marieke örges lekker aete is auch un hobby van de prins net as op de motor toere in d’n Eifel. Vruuger is Tommy lid gewaes van waterskouting vereiniging Belletable Stella Maris in Bliërick.
Adjudant Bram Hasselmann (43) is auch gebaore in Tegele. Inmiddels haos 20 jaor woënéchtig in ’t centrum van Tegele met zien vrouw Marése Faassen en pap van dreej kinder: zoon Milan (13), dochter Elin (11) en zoon Owen (8). Bram haet van doënbeej al good kennis gemak met D’n Oeles aangezeen sjoënvader Bart Faassen in 2000 Prins Bart I waar en sjoënbroor Florian in 2020 al ens adjudant waas. In ’t dageliks laeve is Bram houf van ’t bedriéfsburo beej Janssen de Jong OnderhoudPlus in Venlo. Sjporte duit Bram auch gaer; skie-jje, fitnesse, padelle, wielrenne en aaf en toe kiepe beej ’t hockey. Auch de nuëdige wiénreisjes same met ziene pap en gaer ein hepke aete zien hobby’s van Bram.
Adjudant Dennis Klompmakers (42) is genne Tegelse. Geboare in Bliërick en woënt now in Hout-Bliërick met zien Tegels maedje Ellen Mangnus. Dennis is pap van dreej kinger; Emma van 10, Jurre van 8 en Pleun van haos 3. In ’t dageliks laeve is Dennis mede-eigenaer van assuransie-jkentoër Karis Adviesgroep oét Beringe. In de vreejen tiéd is Dennis vaak te vinge op ’t sjportveld beej de kinger; beej ’t voetballe van zoon Jurre en op ’t hockeyveld van dochter Emma. Zelf sjteit de adjudant aaf en toe op de golfbaan um ein belke te sjlaon. Met de vrindegroep, wao auch sirremoniemeister Ruben Linssen deil van oét mak, probere ze auch idder jaor ein skitripje naor Oësteriék te make en op zienen tiéd ein drankje te doon. De Haandert is veur Dennis ein speesjaale plek. Jeugleefde Ellen kwaam Dennis nao 20 jaor wir taenge op ’t Prinsebal in 2020 en toen sloog de vonk euver.
‘t Motto van ‘t Oeles Trio 2024 luudt: “Prins, Prinses, Adjudant of Kloon … gennen twiéfel: altiéd doon! Op zóndaag 4 fibberwarie helt ’t kersverse trio resepsie-j in Kultureel Centrum De Haandert tösse 14.30 en 18.00 oor.
Fotografie: ZEBRA Jordy Caris
