Vanaaf now is ‘t meugelik um d’n Opsjtaeker te koupe. Dees zien te koup beej Timmermans Tegele en Bakker Bart oppe Kerksjtraot in ‘t centrum van Tegele, beej Plus Verbeeten oppe Hei en beej Plus Steyl op Sjteyl. Koste bedrage 5 Euro per Opsjtaeker.
Auch is ‘t meugelik um online via de webshop van D’n Oeles (www.oeles.nl) ein niej exemplaar te besjtelle a 5 Euro. Bezorgkoste bedrage den 2,50 Euro. Dink geej beej ‘t online besjtelle det ‘t inkele daag ken deure vurdet geej d’n Opjstaeker thoes heb.
‘D’n Opsjtaeker® 2023’ ein ôntwerp van Peter van ‘t Hof
Nao twië jaor genne (georganiseerde) vastelaovend, sjtaon veurluipig alle seine op greun veur ein vastelaovesfiës wie we det veuhaer gewend ware. ‘D’n Opsjtaeker®’ is in die vraemde jaore waal gebleve en auch vur de kômmende vastelaovend zal wir ein sjoën exemplaar verkriegbaar zien, ôntworpe door Peter van ’t Hof oét Aarce. “Det ich oppe respectabele laeftiéd van 81 jaor gevraog woord um ‘D’n Opsjtaeker® 2023’ te ôntwerpe ving ich ein groëte iër”.
Det de vastelaovend twië jaor langk groëtendeils neet gevierd kôs waere ging Van ’t Hof aan ‘t hert. Met ‘D’n Opsjtaeker® 2023’ waas hae d’r daoröm nao op zeuk um ‘t juuste geveul te kenne waergaeve, det huërt beej eine vastelaovend dae eindelik wir gevierd meug waere wie ’t zich huërt. Heejbeej kiek hae auch gaer nao ‘t verleeje, gecombineerd met tradisjonele carnavals kenmerke. “Ich bön begôs mit ein trekpop die al besjteit sinds 1700. Nao inkele umzjwervinge kwaam ich terech beej de Kloon, ein figuur det ech beej de vastelaovend huërt”. De trekpop (liéf) en de kloonclown (gezich) zien dudelik te herkenne. Daonaevebeej guëf auch d’m ballon ein extra joeksig tintje aan ‘t ontwerp. Gedeurende ‘t ganse proces haet Van ’t Hof aldoor det ultieme geveul veur de vastelaovend veur auge gehad onger zien eige motto: “Trek zellef ‘ns dinkbeeldig aan ‘t tuike, um d’r veur te zörge det ‘t vastelaovesgeveul wir sjproedelt en tintelt.”
Peter van ’t Hof (getrouwd met Dolly, ein echte Aarcese en vader van 3 kinger), is gebaore in Numwaege en haet waeges ‘t beroep van zien vader as militair in zien jeugdige jaore gans Nederland gezeen. In totaal haet hae daodoor 14 versjillende woënplaatse versjlete, alveures in 1962 definitief truugk te gaon nao Aarce, wao hae met zien elders iërder al wônde. Nao suksesvol de Kunsacademie te hebbe doorlaupe is hae werkzaam gewaes beej de V&D in Venlo en beej inkele vakantieparke in Aarce. Daonao is hae vur zichzelf begôs met ein reclame-bureau. In ziene vreejen tiéd waas (en ís!) hae altiéd actief in ’t vereinigingslaeve, waobeej hae zien creativiteit de vreeje loup kôs laote gaon as o.a. decorbouwer en ôntwerper. Nag altiéd is hae lid van de lokale vastelaovesvereiniging, al is ‘t ôngertösse waal wat minder actief.
‘D’n Opsjtaeker® 2023’ is einem broche dae sjteit vur de betrokkenheid met de Vastelaovend binne de Gemeinte Venlo. Daonaeve guëf ‘t auch einem bliék van waardering vur de vuële vreejwilligers die zich inzette veur de diverse Vastelaovesactiviteite. Met de verkaup van d’m broche wuërt d’r taeves eine finansjelen impuls gegaeve aan alle vastelaovesveireniginge binne de gemeinte. ‘D’n Opsjtaeker® 2023’ wuërt op d’n Elfde van d’n Elfde gepressenteerd. Vanaaf daen datum is hae auch te kaup beej diverse winkels en via de online-kanale van D’n Oeles.
