Vastelaovesgezelsjap D’n Oeles oét Tegele krieg eine niej-je Vors. De wisseling van de wach zal vriédaág 15 november 2024 plaatsvinge in de Harmoniezaal.
Nao viéf seizoene en dreej gekaoze prinse, sjtop Roy Peters as Oelesvors. Hae druëg ‘t stekske euver aan Rijvers. Rijvers is gennen ônbekende binne de Tegelse vastelaovesvereiniging. Hae waás in 2015 adjudant van prins Paul II (Smeets), woord daornao lid van de Raod van Elf en vervulde vervolges viéf jaor de funksie van sirremoniemeister. Auch goof hae inkel jaore leiding aan de VOA, de sociëteit van aad Oeles-adjudanten.
Vanaaf 20.11 oor is d’r gelaegenheid um afsjied te nimme van Roy Peters en zienen opvolger Frank Rijvers te felisitere met zien beneuming. De offisjeele resepsie-j begint um 20.11 oor en zal twië oor deure.
